2020/11/25 06:00

بىلدۈرگۈ:

ۋەتەندىكى تور بېكەتلەردىن ماتېرياللارنى ئەينەن يۆتكەۋاتىمىز، ئاتالغۇلار بىزگە ۋەكىللىك قىلمايدۇ. يوقىلىش ئالدىدا تۇرغان ھۆججەت، يازمىلارنى قۇتقۇزۇش ئۈچۈن، سىزمۇ ماقالە-ئەسەر يوللاڭ.


ئىپارگۈل (تۇرغۇن ئالماس)

يوللىغۇچى: ئەبۇغۇفران, 2019/05/18 22:09

ئالدىنقى تېما - كېيىنكى تېما

ئەبۇغۇفران

ئىپارگۈل

تېخىچە يېشىلگەن ئەمەسمىش بىر سىر،

ئىنساننىڭ تەقدىرى دېگەن تېپىشماق.

دۇنيادا يۇلتۇزى ئوخشىغانلارمۇ،

تەس ئىكەن بىر بىرى بىلەن تېپىشماق.

قۇتۇلماي نادانلىق ئاسارىتىدىن،

تەقدىرگە ئالدىنىپ ئۆتتۇق كوپ زامان.

پەن ئېلىم ئەھلىنىڭ جاسارىتىدىن،

ياشنىدى ھېسابسىز بوستان گۈلىستان.

نۆۋىتى ماسلىشىپ كەلدىمۇ ئامەت،

ئالدىمدا ئۇشتۇمتۇت بولدۇڭ نامايان.

ياكى سەن بەختىمنىڭ كۈلۈپ ئېچىلغان،

خۇشپۇراق گۈلىمۇ ھېچ سولمايدىغان.

قارىدىڭ يېقىملىق سىرلىق كۆز تىكىپ،

تەبەسسۇم ئارىلاش يۈرەكنى قىيناپ.

ھاياجان ئىلىكىدە يۈرىكىم ئېغىپ،

ئورنىغا چۈشمىدى تا سوقۇپ ئويناپ.

تەڭرىنىڭ قۇدرىتى ئۇلۇغ ھەم چەكسىز

سېنىمۇ ياراتقان ئوماق ئۆزگىچە،

گويا سەن كېچىسى ئوتلۇق يۇلتۇزدەك،

يانىسەن تاڭ سەھەرگىچە.

ئىپارگۈل ئۆچمەس ئوت كۆيدۈرىدىغان،

تەنلىرىم كۆيىدۇ يېنىپ،

ياكى سەن سەنەممۇ سۆيدۈرىدىغان،

يېنىشلاپ كۆيسەممۇ سېنى كۆپ قېتىم

قانمىدى يۈرىكىم بىر قېتىم تىنىپ.

بىلمىدىم كەچكۈزنىڭ ئاپتىپى سىمان،

ئىلمان مۇھەببەت ماڭا يولۇققان.

ھاياتنىڭ كۆڭۈلسىز دەرد ئەلەملىرى

كۆكسۈمگە تىكەندەك قاچان قادالغان.

كېتىمەن بىر كۈنى مەڭگۈ يىراقلاپ،

پىنھاندا كۆز يۇمغان ئانام قېشىغا

كېلەمسەن ئىپارگۈل مېنى يات ئېتىپ

جىمجىت قاراڭغۇ قەبرەم بېشىغا.
ئەركىن ئاسىيا تورى